Ebólufaraldur herjar nú í bænum Bikoro í norðvesturhluta Lýðstjórnarlýðveldisins Kongó. 17 hafa látist af völdum veirunnar. Þetta kemur fram í tilkynningu frá heilbrigðisyfirvöldum í landinu sem segja faraldurinn skapa neyðarástand innanlands og hafa áhrif á alþjóðavettvangi.

21 hefur greinst með veiruna og 17 af þeim eru látnir. Þetta er níundi ebólafaraldurinn í landinu síðan 1976 þegar fyrst var staðfest að ebóla hefði gosið upp.

Alþjóðaheilbrigðismálastofnunin WHO staðfestir að ebóla hafi fundist í tveimur blóðsýnum af fimm sem tekin voru úr sjúklingum. WHO vinnur að því ásamt stjórnvöldum í Kongó að bregðast við faraldrinum. Ein milljón dollara hefur verið sett í neyðarsjóð vegna faraldursins og rúmlega 50 sérfræðingar hafa verið kallaðir til starfa með yfirvöldum.