Gautaborgarpósturinn hefur eftir Katarina Idegård, verkefnastjóra í málum er varða svokallað heiðursofbeldi og kúgun, að hættan á að stúlkur lendi í þessu aukist alltaf þegar frí er í skólum og þá sérstaklega í sumarfríinu.
Eins og fyrr segir er stúlkum, sem óttast að neyða eigi þær í hjónaband eða umskera, ráðlagt að stinga skeið ofan í nærbuxur sínar áður en þær fara í vopnaleit á flugvöllum.
„Ef skeið er í nærbuxunum fer viðvörunarkerfi vopnaleitarhliða á flugvöllum í gang. Þá er fólk tekið afsíðis inn í herbergi og þar geta stúlkurnar sagt starfsfólkinu ef verið er að þvinga þær til einhvers. Þetta er síðasta tækifæri þeirra til að láta yfirvöld vita.“
Er haft eftir Idegård.
Hugmyndin að baki þessu er upprunnin í Englandi og kom fram á sjónarsviðið fyrri 5-6 árum. Þá voru það stuðningssamtökin Karma Nirvana, sem aðstoða fórnarlömb nauðungarhjónabanda, sem ráðlögðu ungum stúlkum að setja skeið í nærfötin sín til að vopnaleitarhliðin færu í gang á flugvöllum. Samkvæmt umfjöllun The Guardian frá 2013 sögðu samtökin að þetta ráð þeirra hafi komið í veg fyrir að margar stúlkur væru sendar úr landi og neyddar í hjónabönd.
Borgaryfirvöld hafa tekið upp samstarf við landamæralögregluna og flugvallaryfirvöld á Landvetter flugvellinum í borginni til að koma í veg fyrir ferðir sem þessar. Gautaborgarpósturinn hefur eftir Ann Jacobson, yfirmanni öryggismála á flugvellinum, að allir starfsmenn viti hvað það þýði ef einhver er með skeið í nærbuxunum. Þá sé viðkomandi að gera viðvart um að verið sé að flytja hann úr landi gegn vilja hans.
Samkvæmt tölum frá 2014 var talið að um 100.000 manns, yngri en 25 ára, sættu heiðurstengdri kúgun í Svíþjóð miðað við þær forsendur sem stjórnvöld gefa sér um hvað heiðurstengd kúgun er.