Óhugnanleg sjón blasti við lögreglumönnum þegar þeir voru kallaðir að heimili í Brooklyn á mánudag. Þar fannst fjölskyldufaðirinn, Jeremy Safran, látinn í blóði sínu í kjallaranum og inni í skáp fannst 28 ára karlmaður, Mirzo Atadzhanov, blóðugur.
Mirzo þessi hafði brotist inn á heimili fjölskyldunnar þar sem hann varð Jeremy, sem var sextugur prófessor, að bana.
Skömmu áður en þessi óhugnanlega atburðarás hófst fékk eiginkona Jeremy smáskilaboð frá nágrannakonu sinni vegna óvenjulegra mannaferða við húsið. Nágranninn, Doreen Giuliano, sá karlmann sniglast í kringum húsið og þegar hún sá hann lauma sér inn um glugga sendi hún nágrannakonu sinni skilaboð. Jeremy varð eftir í húsinu en eiginkona hans og dóttir forðuðu sér út og hringdu á lögregluna.
Þegar lögreglumenn komu á staðinn mætti þeim ófögur sjón. Jeremy hafði verið barinn og stunginn til bana en Mirzo var sem fyrr segir handtekinn inni í skáp skömmu síðar. Sjálfur sagði Mirzo að um sjálfsvörn hafi verið að ræða en líklega mun sú málsvörn ekki skila honum miklu þegar málið kemur til kasta dómstóla.
Óvíst er hvort Mirzo hafi þekkt eitthvað til fjölskyldunnar en að sögn lögreglu eru vísbendingar um að fyrr um kvöldið hafi hann elt átján ára gamla dóttur hjónanna heim. Þykir ekki ólíklegt að Mirzo hafi ætlað að vinna henni mein.
„Mér finnst mjög óhugnanlegt að hugsa til þess að einhver geti brotistinn í húsið þitt og falið sig í kjallaranum. Ég held að hann hafi verið að bíða eftir konunum,“ segir Doreen.
Að því er fram kemur í frétt The Daily News var Mirzo kærður fyrir tilraun til nauðgunar árið 2016. Þá var hann grunaður um að hafa ráðist á kanadískan ferðamann sem gisti hjá honum, en sá hafði pantað sér gistingu í gegnum vefinn couchsurfing.com. Málið var síðar látið niður falla.