Danska ríkisútvarpið hefur eftir talsmanni danska ríkislögreglustjóraembættisins að þessi góði árangur byggist á nokkrum atriðum. Árvekni og dugnaður lögreglumanna spili þar stórt hlutverk en einnig þurfi smávegis heppni að fylgja með.
Magnið af hassi og E-töflum, sem var haldlagt á síðasta ári, er það mesta sem lagt hefur verið hald á í 20 ár. Mikið magn af því hassi sem var haldlagt var tekið í Kristjaníu.
Mikil leynd hvílir yfir E-töflumálinu og hefur lögreglan ekki viljað upplýsa neitt um það nema að þetta mikla magn hafi verið haldlagt í einni aðgerð í Kaupmannahöfn en hvar og hvenær fæst ekki enn uppgefið.
Hald var lagt á 34 kg af MDMA en það efni varð 17 ára pilti að bana á síðasta ári en vinur hans lifði neysluna af. Talsmaður lögreglunnar sagði að neysla á efnum eins og MDMA fari vaxandi en á móti virðist vera að draga úr neyslu á heróíni.