Allt hófst þetta með að Växjö Muslim Foundations samtökin hafa fengið heimild hjá lögreglunni til að nota hátalara þegar kallað er til bæna. Fyrsta bænakallið verður sent út á föstudaginn og mun vara í rúmar fjórar mínútur.
Skoðanir um þetta eru skiptar hjá stjórnmálamönnum, bæði á landsvísu og í Växjö. Anna Tenje, bæjarfulltrúi Moderaterna, segir að hún telji ekki að bænaköllin muni styrkja samþættinguna í bænum. Þess í stað verði þau til að auka á andstæðurnar í samfélaginu.
Kristilegir demókratar eru þeirrar skoðunar að ekki eigi að vera löglegt að kalla til bæna með hátölurum utan á moskum. Stefan Löfven, forsætisráðherra, hefur ekki viljað taka afstöðu til málsins og segir að það eigi að vera í valdi hvers sveitarfélags að taka ákvörðun um mál sem þessi.
Lögreglan telur ekkert standa í vegi fyrir að nota megi hátalara til að kalla til bæna í moskunni.
Leyfið gildir í einn mánuð til að byrja með.