Lífið sem ellilífeyrisþegar var rétt að hefjast hjá Lekander-hjónunum i Mantorp í Svíþjóð. Ann-Christine var nýbúin í hjáveituaðgerð og sjón eiginmanns hennar, Tor, var ekki eins slæm og áður. Þau ætluðu að taka því rólega til æviloka og njóta lífsins en þá kom Edvin Gyllensvvan, 23 ára, til sögunnar.

Vinir og ættingjar lýstu Tor sem nákvæmum og vönduðum manni. Hann hafði keypt sér sjálfvirka sláttuvél til að halda garðinum í toppstandi þar sem aldurinn var farinn að segja til sín og líkaminn réði ekki eins vel við garðsláttinn og áður. Hjónin höfðu undirbúið rólegt og þægilegt líf þessi síðustu æviár sín.

„Ég þekkti þau allt mitt líf. Það ömurlega er að þau voru tvær venjulegar manneskjur, ekkert frábrugðin öðrum. Það var engin ástæða fyrir að þetta gerðist. Ég trúi því varla enn að þetta hafi gerst.“

Hefur Expressen eftir ættingja þeirra hjóna en hann bjó einnig í námunda við þau.

„Eins og að vera í skáldsögu, eins hræðilegt og það hljómar“

Sagði hann.

Fundust látin

Þann 12. júní á síðasta ári fundust Tor og Ann-Christeine Lekander myrt á heimili sínu. Rannsókn lögreglunnar leiddi í ljós að þau höfðu verið bundin föst í eldhússtóla daginn áður. Þann sama dag höfðu 15.000 krónur verið teknar út af greiðslukorti þeirra í hraðbanka.

Áður en morðinginn yfirgaf húsið límdi hann yfir munn og nef hjónanna þannig að þau gátu ekki andað. Síðan skar hann þau á háls. Áður hafði hann fengið þau til að segja hver pinnúmerin á greiðslukortum þeirra voru. Hann var með límband, hníf og loftbyssu meðferðis.

Umfangsmikil lögreglurannsókn hófst strax á morðunum en í upphafi hafði lögreglan ekki á miklu að byggja. Þó fundust skóför í húsinu og DNA-sýni.

Í þrjá mánuði leit út fyrir að lögreglunni tækist ekki að upplýsa morðin og hafa hendur í hári morðingjans. Að lokum leiddi rannsóknin lögregluna til Edvin Gyllensvaan, 24 ára fjölskylduföður, en það voru DNA-sýnin sem komu lögreglunni á slóð hans. Á fatnaði Gyllensvaan fundust DNA-sýni sem passa við það sem fannst í húsinu.

Gyllensvaan neitar að hafa myrt hjónin en hann játaði fyrir dómi að hafa bundið þau og keflað sem og að hafa tekið peninga út á greiðslukort þeirra.

Geðrannsókn leiddi í ljós að hann hafi ekki þjáðst af alvarlegum geðsjúkdómi þegar morðin voru framin eða eftir það segir í umfjöllun Sænska ríkisútvarpsins. Hann var því metinn sakhæfur. Saksóknari krafðist ævilangs fangelsis yfir honum og á það féllst dómurinn. Hann var því dæmdur í ævilangt fangelsi.

Það hefur vakið athygli í þessu skelfilega máli að engin tengsl voru á milli Gyllensvaan og Lekander-hjónanna. Þau virðast því hafa orðið fórnarlömb fyrir algjöra tilviljun.

Rannsókn málsins var mjög umfangsmikil en 1.219 yfirheyrslur fóru fram og rúmlega 100 tæknirannsóknir voru framkvæmdar.

Gyllensvaan hefur áfrýjað dómnum.