Fimm af æðstu leiðtogum hryðjuverkasamtakanna sem kenna sig við Íslamska ríkið (IS) voru handteknir á landamærum Sýrlands og Íraks í gær. Þetta kemur fram í fréttatilkynningu frá bandalagsþjóðum undir forystu Bandaríkjanna. Það var farsímaapp sem varð leiðtogunum fimm að falli.

Ryan Dillon, hershöfðingi, segir að handtökurnar séu mikið áfall fyrir IS. Það voru íraskir sérsveitarmenn sem handtóku fimmmenningana á landamærunum. Leiðtogarnir höfðu verið lokkaðir þangað með fölskum skilaboðum sem voru send í gengum dulkóðaða spjallforritið Telegram sem liðsmenn IS nota mikið til samskipta.

Skilaboðin voru send úr síma sem var í eigu Ismail al-Eithawi en hann var helsti aðstoðarmaður Abu Bakr al-Baghdadi leiðtoga IS og sjálfskipaðs kalífa í ríki hryðjuverkasamtakanna.

Meðal þeirra sem voru handteknir er Saddam Jamal sem var áður héraðsstjóri IS í austurhluta Sýrlands.

Talsmaður bandaríska varnarmálaráðuneytisins sagði að íraskar öryggissveitir ættu heiðurinn af handtökunum.

Abu Bakr al-Baghdadi hefur ekki enn verið handtekinn og óvíst er hvort hann er lífs eða liðinn. Rússar sögðu að hann hefði látist í loftárás á Raqqa á síðasta ári en Bandaríkjamenn segja það ólíklegt. Talið er að ef al-Baghdadi er á lífi þá leynist hann á landamærasvæðinu á milli Sýrlands og Íraks.