Niðurstaðan liggur nú fyrir og eins og margir áttu von endaði Hollendingurinn Michael van Gerwin í efsta sæti riðlakeppninnar með 23 stig. Hann sigraði í 11 af 16 leikjum, gerði 1 jafntefli og tapaði 4 leikjum. Gerwin sigraði í deildinni 2016 og 2017 og á því titil að verja. Hann er af flestum talinn besti pílukastari heims í dag og trónir á toppi heimslistans.
Í öðru sæti riðlakeppninnar var Michael Smith sem sigraði í 9 leikjum, gerði 2 jafntefli og tapaði 5 leikjum. Smith hefur komið á óvart í vetur og hefur spilað af miklu öryggi.
Í þriðja sæti endaði Gary Anderson sem sigraði í 8 leikjum, gerði 3 jafntefli og tapaði 5 leikjum. Anderson átti á brattann að sækja í upphafi tímabilsins en sótti síðan í sig veðrið og vann góða sigra. Hann vann heimsmeistaratitilinn 2015 og 2016.
Í fjórða sæti riðilsins endaði heimsmeistarinn sjálfur, Rob Cross, en hann var með sama vinningshlutfall og Anderson.
Úrslitin verða næsta fimmtudag í O2 höllinni í Lundúnum. Þar mætast Michael van Gerwin og Rob Cross í undanúrslitum en þeir mættust einmitt í úrslitum heimsmeistarakeppninnar í vetur. Þar bar Cross sigur úr býtum og var það fyrsti sigur hans á stórmóti og það á fyrsta ári hans sem atvinnumaður í pílukasti en hann hafði starfað sem rafvirki áður en hann hellti sér af fullum krafti út í pílukast.
Gary Anderson og Michael Smith mætast í hinum undanúrslitaleiknum. Þeir eru nánir vinir og má segja að Anderson sé lærimeistari Smith. Það heldur þó aldrei aftur af þeim þegar þeir mætast á sviðinu.
Sigurvegarar í þessum tveimur undanúrslitaleikjum mætast síðan í síðasta leik kvöldsins og etja kappi um úrvalsdeildartitilinn og þau 250.000 pund sem sigurvegarinn fær í verðlaun.