Á síðasta ári drápu brasilískir lögreglumenn 5.012 manns en það er 19 prósenta aukning frá 2016. Á sama tíma létust 385 lögreglumenn við skyldustörf en það er 15 prósent fækkun frá 2016. Þetta kemur fram í nýrri skýrslu sem var gerð í samvinnu brasilísku fréttaveitunnar G1, háskólans í Sao Paulo og stofnunar um opinbert öryggi.

Ofbeldisverkum hefur fjölgað í fátæktrarhverfum Rio de Janeiro á undanförnum árum. Þar voru morðin 26 prósent fleiri á síðasta ári en 2015. Skotárásir eru daglegt brauð í þessum hverfum. Ofbeldið er einnig byrjað að dreifast út frá fátæktrarhverfunum yfir í hverfi þeirra sem búa við meiri efni.

Af þessum sökum ákvað þing landsins í febrúar að herinn tæki að sér löggæslu í Rio de Janeiro, bæði ríkinu og samnefndri borg. Þetta er liður í aðgerðum til að reyna að stemma stigum við starfsemi glæpagengja og því ofbeldi sem þeim fylgir.

Morðtíðnin í Rio de Janeiro var 40 morð á hverja 100.000 íbúa á síðasta ári.