Að minnsta kosti 58 Palestínumenn voru drepnir í mótmælum á landamærum Gaza og Ísraels í gær gegn opnun bandaríska sendiráðsins í Jerúsalem. 2.771 særðist að sögn palestínskra heilbrigðisyfirvalda. Ísraelsher skaut á mótmælendur á landamærunum þegar þeir söfnuðust þar til að mótmæla þeirri ákvörðun Bandaríkjastjórnar að flytja sendiráð Bandaríkjanna til Jerúsalem og viðurkenningu Bandaríkjanna á Jerúsalem sem höfuðborg Ísraels. Bandarísk stjórnvöld segja að Hamas samtökin beri alfarið ábyrgð á blóðbaðinu í gær.

Gærdagurinn var blóðugasti dagurinn á Gaza síðan 2014. Sky segir að samkvæmt frétt AP þá hafi Ísraelsmenn meðal annars notað skriðdreka til að skjóta á mótmælendur. Áður höfðu mótmælendur kastað eldsprengjum og grjóti í átt að hermönnum.

Talsmenn Ísraelshers segja að skotið hafi verið á hermenn og að sumir mótmælendur hafi reynt að brjótast í gegnum girðingar. Einnig segja þeir að hermenn hafi skotið þrjá Palestínumenn til bana þegar þeir voru að koma sprengju fyrir.

Palestínskir embættismenn segja að sex börn yngri en 18 ára hafi verið meðal þeirra sem féllu í gær. 225 börn og 79 konur eru sagðar hafa særst.

Mahmoud Abbas, forseti Palestínu, fordæmi atburði gærdagsins og sagði að um „fjöldamorð“ hefði verið að ræða.

Talsmenn Hvíta hússins sögðu að Hamas samtökin beri ein ábyrgð á blóðbaðinu í gær en Hamas fer með völdin á Gaza. Samtökin eru skilgreind sem hryðjuverkasamtök af Bandaríkjunum og ESB.