Banvænn svínavírus, sem líkist SARS vírusnum sem leggst á öndunarfæri fólks, gæti borist í fólk úr svínum. Porcine deltacoronavírusinn veldur bráðum niðurgangi og uppköstum í svínum og getur orðið þeim að bana. Niðurstöður nýrrar rannsóknar benda til að vírusinn geti borist á milli fruma ólíkra tegunda, þar á meðal manna.

Vírusinn uppgötvaðist fyrst í Kína árið 2012. Hann líkist SARS og MERS að ákveðnu leyti. 774 létust af völdum SARS í 37 ríkjum á árunum 2002 og 2003. Rúmlega 700 manns hafa látist af völdum MERS í Sádí-Arabíu en vírusinn herjar þar þessa dagana.

Sky segir að í kjölfar porcine deltacoronavírus faraldurs í Bandaríkjunum 2014 hafi menn farið að hafa áhyggjur af vírusnum. Í nýju rannsókninni, sem hefur verið birt í vísindaritinu Proceedings of the National Academy of Sciences, kemur fram að vírusinn ráðist á ákveðna gerð viðtakendasameindar á yfirborði fruma í öndunarvegi og meltingarvegi.

Tilraunir leiddu í ljós að vírusinn gat borist í kjúklinga, ketti og fólk. Ekki er þó vitað til að vírusinn hafi borist í fólk.