Lögreglan í Malmö í Svíþjóð rannsakar nú fimm hópnauðganir sem hafa átt sér stað í borginni frá því í nóvember. Nýjasta ofbeldisverkið var framið þann 1. maí þegar tvítugri konu var nauðgað af fjórum mönnum. Þeir hafa verið handteknir og sitja nú í gæsluvarðhaldi.

Expressen skýrir frá þessu. Þetta var fimmta hópnauðgunin sem tilkynnt var til lögreglunnar í borginni síðan í nóvember.

„Það sem er almennt hægt að segja um þessi mál er að þau eru oft flókin og rannsókn þeirra getur tekið langan tíma.“

Er haft eftir Nils Norling, talsmanni lögreglunnar í Malmö.

Það var þann 15. nóvember að tilkynnt var um fyrstu hópnauðgunina sem átti sér stað við Södervärn. Daginn eftir var tilkynnt um aðra í Sege Park. Mánuði síðar var 17 ára stúlku hópnauðgað á leikvelli í Sofielund. Aðfaranótt þriðja febrúar var konu nauðgað af tveimur 15 ára piltum. Þeir voru handteknir en hafa verið látnir lausir og eru nú í umsjá barnaverndaryfirvalda þar sem þeir eru of ungir til að sitja í varðhaldi. Nýjasta málið er síðan eins og áður kom fram frá 1. maí. Lögreglan segir að engin tengsl séu á milli málanna.

Málin hafa að vonum vakið mikinn óhug meðal borgarbúa og í lok árs 2017 setti lögreglan sérstakan rannsóknarhóp á laggirnar til að rannsaka þessi mál.