Dushaun Henderson, 24 ára, er talinn vera maðurinn á bak við svindlið að sögn Chicago Tribune. Hann hefur nú verið ákærður fyrir þjófnað og brot á póstlögum. Svindlið fólst í að hann skilaði inn eyðublaði um breytt heimilisfang til bandaríska póstsins. Á eyðublaðinu tók hann fram að UPS væri að flytja höfuðstöðvar sína frá 55 Glenlake Parkway í Atlanta í Georgia til Chicago og það heim til hans. Pósturinn tók við eyðublaðinu og krafði Henderson ekki um frekari upplýsingar eða skilríki.
Skömmu eftir að Henderson skilaði eyðublaðinu inn fór mikið magn af pósti að berast til hans en þessi póstur var stílaður á höfuðstöðvar UPS. Samkvæmt frétt Chicago Tribune var um að ræða mörg þúsund pakka, bréf til stjórnenda UPS, bréf sem innihéldu viðskiptaleyndarmál og greiðslukort fyrir UPS.
Auk þess bárust Henderson margar ávísanir og var hann búinn að innleysa ávísanir fyrir 58.000 dollara þegar hann var handtekinn.
Hann tilkynnti um breytt heimilisfang í október en það var ekki fyrr en um miðjan janúar að öryggisdeild UPS uppgötvaði að hluti af þeim pósti sem átti að berast til höfuðstöðvanna í Georgia endaði í lítilli íbúð í Chicago.
Eftir að upp komst um málið skýrðu starfsmenn bandaríska póstsins frá því að skyndilega hafi mikið magn af pósti byrjað að berast til lítillar íbúðar í Chicago. Magnið var svo mikið að það rúmaðist ekki í póstkassanum. Af þeim sökum var aukapóstkassi settur upp svo hægt væri að koma öllum bréfunum og pökkunum fyrir.
Við leit heima hjá Henderson fundust rúmlega 3.000 bréf og pakkar.
Henderson neitar sök og segir að einhver hafi greinilega nýtt sér nafn hans til svikastarfseminnar. Ákæruvaldið leggur þó ekki trúnað á þennan framburð hans.
