Hópur sérfræðinga hefur unnið að rannsókn málsins og umfangsmikil leit hefur farið fram að vélinni í Indlandshafi og víðar á undanförnum misserum. Smávegis brak úr vélinni hefur fundist en það hefur ekki orðið til þess að hún hafi fundist.
Samkvæmt fréttum ýmissa erlendra fjölmiðla þá telur sérfræðingahópur sig nú hafa leyst gátuna um hvarf vélarinnar. Haft er eftir Larry Vance, fyrrum rannsakanda hjá kanadískum samgönguyfirvöldum, að það sé vaxandi samhljómur meðal sérfræðinga um hvað gerðist á síðustu stundum flugsins.
Vance og aðrir sérfræðingar í sérfræðingahópnum eru sammála um að flug MH370 hafi horfið og farist því flugstjórinn, Zaharie Ahmad Shah, hafi ætlað sér að fremja sjálfsvíg. Sérfræðingarnir telja að Shah hafi valið afskekkta og einangraða flugleið þannig að hann gæti látið vélina hverfa. Hann hafi af ásettu ráði forðast ratsjár á lokastundum flugsins.
Simon Hardy, flugmaður á Boeing 777 vélum, segir að Shah hafi tekist að sneiða hjá ratsjám taílenska og malasíska hersins. Hann segir að Shah hafi flogið vélinni eftir landamærum ríkjanna þannig að hún fór sitt á hvað inn á yfirráðasvæði þeirra. Þannig hafi honum tekist að forðast ratsjár herja ríkjanna með þessu.
John Dawson, lögmaður fjölskyldna níu farþega sem voru í vélinni, segir að gögn bendi til þess að einhver úr áhöfn vélarinnar beri ábyrgð á hvarfi hennar. Sterkar vísbendingar séu um að svo hafi verið.
„Líklegast var lokað fyrir súrefnisstreymið, farþegarnir köfnuðu, þetta var morð af yfirlögðu ráði. Þetta var vel skipulagt.“
Er haft eftir honum.