Óhætt er að segja að hjón á Staten Island í New York, Matthew og Maria Colonna, hafi rekið upp stór augu þegar þau rákust á dularfullan kassa þegar þau voru að taka til í garðinum hjá sér á dögunum.

Þannig er mál með vexti að Maria og Matthew voru að grafa upp tré í garðinum þegar þau komu niður á kassann sem búið var að grafa niður. Í fyrstu töldu þau að um væri að ræða einhverskonar kassa með raflögnum en svo reyndist aldeilis ekki vera.

Við nánari skoðun kom í ljós að um var að ræða peningaskáp sem innihélt 52 þúsund Bandaríkjadali í peningum, um fimm milljónir króna. Þá innihélt kassinn ýmsa skartgripi úr demöntum og gulli, hringa í tugatali svo dæmi sé tekið.

Í kassanum var einnig lítill miði með heimilisfangi á og við skoðun á miðanum áttuðu Matthew og Maria sig á að hann tengdist húsi skammt frá þeim. Þau ákváðu að heimsækja nágranna sína og þá kom á daginn að þau hefðu orðið fyrir barðinu á bíræfnum þjófum árið 2011.

Brotist var inn á heimili nágrannanna þar sem peningaskápnum var meðal annars stolið. Lögreglan í New York staðfesti svo að þau hefðu tilkynnt að skápurinn hefði horfið árið 2011 og þau væru réttmætir eigendur þess sem í honum var.

Matthew og Maria skiluðu því skápnum í réttar hendur. Maria segir að þau hjónin hafi fengið spurningar um það hvers vegna þau skiluðu honum. „Það var aldrei nein spurning. Við áttum hann ekki,“ segir Maria.

Lögregla telur ekki ólíklegt að þjófarnir hafi á sínum tíma átt í erfiðleikum með að flytja skápinn með sér og gripið til þess ráðs að grafa hann. Eitthvað varð þó til þess að þeir vitjuðu hans ekki aftur.