Pressan

Von Mathús og Bar: Best geymda leyndarmál Hafnarfjarðar (og þó víðar væri leitað)

Ragna Gestsdóttir
Miðvikudaginn 16. maí 2018 22:30

Einstaklingur eins og ég sem býr, starfar og nýtur sín í póstnúmerum 101, 5 og 8, þar sem veitingastaðir eru á hverju strái og svo margir að maður nær aldrei að fara hringinn og prófa þá alla, telur sig kannski ekki hafa ástæðu til að leita lengra. En þegar vinkona mín bauð mér með sér til Hafnarfjarðar að kíkja á veitingastaðinn Von Mathús og bar þá sló ég að sjálfsögðu til, enda matur og góður félagsskapur alveg frábær samsetning.

Staðurinn lætur ekki mikið yfir sér utan frá, hvítmálað hús með litlu skilti við Strandgötuna í Hafnarfirði og ég er viss um að margir bílstjórar sem þjóta um götuna taka ekkert eftir honum. (Þjóninn okkar sagði okkur hins vegar að þegar hlýnaði í veðri sæti fólk úti fram eftir kvöldi og búið væri að stækka útisvæðið til að fleiri gætu setið úti. Það er einmitt frábært útsýni út á sjóinn og höfnina og við ákváðum auðvitað að heimsækja staðinn aftur seinna og sitja þá úti.)

Þegar inn er komið tekur við allt önnur stemning, bjartir og hlýir litir, innréttingar og munir á veggjum og í hillum í anda sjómennskunnar og opið inn í eldhús þannig að hluti gesta getur fylgst með eldamennskunni. Kósí og afslöppuð stemning og alls konar hópar að borða, foreldrar með börn sín, vinkonuhópar og pör.

Þjónarnir voru tveir á vakt, tvær konur sem voru með allt á hreinu og vissu hvað þær væru að bjóða upp á, svöruðu öllum spurningum, snöggar að afgreiða, glaðværar og skemmtilegar. Sú sem vísaði okkur til sætis bauð okkur kokteil fyrir matinn og benti okkur á að þriðjudagar væru kokteiladagar, ef við vildum koma aftur á þeim degi. Við ákváðum að vera ekkert að flækja kvöldið og leyfa henni einfaldlega að ráða, bæði drykk og mat.

Áfengur heilsudrykkur kemur á óvart

VON á krana var kokteillinn sem við fengum; gin, rauðsófusafi,engifer, kardimommur,sýróp og sítróna. Hljómar sérkennilega og fyrir utan ginið óþarflega hollt fyrir kokteill, en kom á óvart. Mjög góður fyrir þá sem drekka sterk vín og reif alveg vel í bragðlaukana en ekki of mikið samt.

Íslensk árstíðabundin matargerð

Matseðillinn samanstendur af íslensku hráefni, sumt eins og fiskurinn kemur bara úr næsta húsi, Hafinu sem er við höfnina. Þjónninn sagði okkur líka að matseðillinn tekur breytingum eftir árstíðum og því er hægt að koma aftur og aftur og upplifa alltaf og prófa eitthvað nýtt.

Það skal tekið fram að þegar litið er yfir matseðilinn þá er margt þar sem fyrir gikki lítur skringilega út, jafnvel of hollt, eins og til dæmis rauðrófa, sem er einn af forréttunum og kom fyrst á borðið ásamt keilu. Við vinkonurnar erum báðar af kynslóð sem var alin upp á soðinni ýsu með kartöflum og sósu og höfum hvorugar haft mikla hæfileika til að elda flóknari fiskrétti en það. Við ákváðum hins vegar eftir forréttinn að það yrði að verða breyting á því.

Rauðrófan er með furuhnetum, rósmarín, fennikku og toppkáli og keilan með piparrót, sýrðum rjóma, agúrkum og sólblómafræum. Hér kom líka aðeins mismunandi smekkur í ljós, vinkonan kláraði rauðrófuna upp til agna og ég keiluna, og ég er grínlaust búin að hugsa um hana síðan. Og er alltaf að bíða eftir að einhver stingi upp á að fara út að borða, svo ég geti stungið upp á Von.

Aðalréttirnir voru tveir: þorskur og nautakinn og mjöðm. Fiskurinn kemur með jarðskokkum, gnocchi, sítrónumajó,brúnu smjöri og tind. Nautið með sveppum, kartöflum, fáfnisgrasmæjó og rauðvínssósu.
Hér deildum við vinkonurnar réttunum jafnt á milli okkar, en þó mér fyndist báðir réttirnir góðir, þá fannst mér fiskurinn betri. Kannski vegna þess að ég var enn í matarvímu eftir keiluna eða bara af því að ég er mun duglegri almennt í að panta kjöt þegar ég fer út að borða og fiskurinn því meira spennandi og nýstárlegri.

Eftirréttirnir voru líka tveir: hvítsúkkulaði smjörkaka með perum, súkkulaði, saltkaramellu og heslihnetuís og cremé brulée með blóðappelsínu, möndlum og kakó. Þjóninn sagði okkur að núna væri árstíð blóðappelsínunnar og hún því mikið notuð, ég held mig misminni ekki þegar ég segi að þetta er í fyrsta sinn sem ég prófa hana í matargerð og hún passar frábærlega með cremé bruléeinu.
Saltkaramellan er svo í tísku núna og alls staðar hægt að kaupa hana í einhverju formi, hvort sem er nammi út í búð, ís eða annað. Hún hentaði líka einstaklega vel hér sem eftirréttur.

Það má alls ekki skilja við Von án þess að minnast á brauðið, sem er bakað á staðnum. Okkur vinkonunum fannst við pínu asnalegar að falast eftir að fá að kaupa eitt brauð til að taka með heim, en þjónninn okkar brosmildi sagði það minnsta mál og margir sem gerðu það. Við fengum líka smjör með og brauðið dugði hjá mér alveg í þrjá daga, mjúkt og gott.

Ég mæli hiklaust með heimsókn á Von fyrir alla matgæðinga sem vilja upplifa góðan íslenskan mat með nýju „twisti.“ Svo skemmir ekki fyrir að besti tónleikastaður höfuðborgarsvæðisins, Bæjarbíó, er rétt hjá og upplagt að kíkja á þessa tvo staði í sömu ferð.

VON Mathús og Bar er á Strandgötu 75, Hafnarfirði. Síminn er 583-6000. Heimasíðan er hér og Facebooksíðan er hér.

Opnunartímar eru þriðjudaga til fimmtudaga frá kl. 11.30-14 og kl. 17.30-21. Föstudaga og laugardaga frá kl. 11.30-14 og kl. 17.30-22.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Raflost hefst í dag