Á þriðjudaginn tilkynnti ríkisstjórnin að hún hefði náð samkomulagi við Danska þjóðarflokkinn, jafnaðarmenn og Radikale um nýjar reglur um útleigu í gegnum Airbnb og hversu mikið leigusalar mega leigja út fyrir áður en þeir þurfa að greiða skatt af leigutekjunum. Einnig var sett þak á fjölda sólarhringa sem má leigja húsnæði út á ári og takmarkast útleigan nú við 70 gistinætur á ári en sveitarfélögum er heimilt að heimila útleigu í allt að 100 daga á ári.
Danska ríkisútvarpið hefur eftir Karsten Lauritzen, ráðherra skattamála, að Airbnb hafi nú fallist á að afhenda skattayfirvöldum gögn um útleigu á húsnæði í Danmörku og sjá til þess að viðskiptavinir fyrirtækisins greiði skatt í Danmörku. Skattamálaráðuneytið segir að líklega sé Danmörk fyrsta ríki heims sem semur við Airbnb um upplýsingagjöf af þessu tagi.
Það hefur hugsanlega ýtt við Airbnb í þessu máli að samkvæmt samkomulaginu frá því á þriðjudaginn eru fyrstu 28.000 krónurnar af skammtímaleigu húsnæðis skattfrjálsar árlega en fyrstu 40.000 krónurnar ef um sumarhús er að ræða. Skattleysismörkin eru þó háð því að útleigufyrirtækin, í þessu tilviki Airbnb, starfi með skattayfirvöldum og upplýsi þau um leigutekjur fólks. Ef það er ekki gert eru skattleysismörkin 11.000 krónur á ári og aðeins má leigja húsnæði út í 30 daga á ári.
Markmiðið með nýjur reglunum og samningnum við Airbnb er að koma í veg fyrir skattsvik og útleigu íbúðarhúsnæðis eins og um hótel sé að ræða.