48 íbúar á Skovgården, sem er dvalarheimili eldri borgara í Hjørring á Jótlandi í Danmörku, voru ofarlega í huga konu sem starfaði sem sjálfboðaliði á dvalarheimilinu. Hún arfleiddi dvalarheimilið að nær öllum eigum sínum og er óhætt að segja að þessi fallegi gjörningur ylji íbúunum um hjartaræturnar.

BT hefur eftir John Larsen, stjórnanda dvalarheimilisins, að þetta hafi komið mjög á óvart en jafnframt verið mjög ánægjulegt. Það sé sjaldgæft að opinber stofnun erfi svona mikla peninga. Dvalarheimilið erfði íbúð, hlutabréf og reiðufé eftir konuna. Heildarverðmæti arfsins er um 3,5 milljónir danskra króna en það svarar til um 56 milljóna íslenskra króna.

Hluti af peningunum verður notaður til ferðalaga á næstu árum en hinn hlutinn til að kaupa litla rútu og reka hana í 10 ár.

Sjálfboðaliðar á dvalarheimilinu selja dagblöð á götum úti til að afla fjár til dvalarheimilisins en enginn átti von á að góðmennska eins sjálfboðaliðanna væri svona mikil.