Fimmtán ára drengur í Vancouver í Washington-ríki í Bandaríkjunum hefur verið dæmdur til að greiða 37 milljónir Bandaríkjadala, tæpa fjóra milljarða króna, eftir að hafa kveikt eld sem olli gríðarlegri eyðileggingu.
Það var á síðasta ári sem pilturinn ákvað að kveikja í flugeldum í kjarrlendi í Oregon. Lítið hafði rignt á þessum slóðum og því var gróðurinn og jarðvegurinn mjög þurr. Eldurinn frá flugeldunum var fljótur að breiða úr sér og varð til þess að illviðráðanlegir skógareldar kviknuðu sem tók tvo mánuði að slökkva.
Skógareldarnir urðu til þess að fjöldi fólks þurfti að yfirgefa heimili sín, skólum, fyrirtækjum og opinberum stofnunum var lokað og þá þurfti að loka mörgum vegum í ríkinu. Þá urðu miklar skemmdir í gljúfri, Columbia River Gorge, sem laðar að sér þúsundir ferðamanna á hverju ári.
Dómarinn í málinu, John A Olson, mat það svo að þessar 37 milljónir Bandaríkjadala væru um það bil kostnaðurinn vegna slökkvistarfs, viðgerða og skemmda sem urðu á hýbílum. Þá var drengnum gert að sinna 1.920 klukkustunda samfélagsþjónustu.
Lögmenn drengsins mótmæltu upphæðinni sem drengnum var gert að greiða og sögðu hana „fráleita“ fyrir svo ungan dreng.