Agnes Mårs er 28 ára og býr í Uppsala í Svíþjóð. Hún á hryssuna Varenza og geymir hana í hesthúsi á sveitabýli nærri Uppsala. Faðir hennar býr á býlinu. Hryssan er fylfull og því setti Agnes upp eftirlitsmyndavél í hesthúsinu svo hún gæti fylgst með hryssunni að heiman. Aðfaranótt þriðjudags ákvað Agnes að kíkja aðeins á eftirlitsmyndavélina en sá þá sér til mikillar skelfingar að maður var í básnum hjá hryssunni.

„Ég vaknaði og sá á skjánum að maður stóð í básnum. Ég fylltist örvæntingu.“

Sagði hún í samtali við TV2.

Hún hringdi í föður sinn sem fór rakleiðis í hesthúsið en þá var maðurinn á bak og burt.

Feðginin skoðuðu síðan upptökur úr eftirlitsmyndavélinni og sáu þá að maðurinn hafði verið í stallinum í um 15 mínútur. Á þeim tíma hafði hann níðst kynferðislega á hryssunni. Fréttamenn TV2 fengu að sjá upptökuna og segja að það leyni sér ekki hvað maðurinn var að gera.

Agnes sagðist vonast til að maðurinn kæmi ekki aftur í hesthúsið. Hún sagði ekki vitað hvort hann hafi áður níðst á hestum í hesthúsinu.

Uppsala nya tidning segir að lögreglan hafi handtekið mann vegna málsins og sé hann grunaður um dýraníð.

Agnes hefur átt Varenza í fjögur ár og segir hana vera rólega en þessa nótt hafi hún verið mjög óróleg. Á upptökum sést að hún reyndi að sparka í manninn en það hræddi hann ekki og telur Agnes að hann sé vanur að umgangast hesta. Hann var ekki með hníf eða önnur vopn með sér og fór gætilega að hestinum.