Eins árs drengur er í lífshættu eftir að ráðist var á hann og móður hans í gær í Lundúnum og þau stungin. Móðir hans er ekki í lífshættu. Lögreglan var kölluð að Swinfield Close í Feltham á áttunda tímanum í gærkvöldi þar sem mæðginin fundust særð. Þau voru flutt með þyrlu á sjúkrahús.

Sky hefur eftir vitni að það hafi heyrt öskur og grát og hafi verið skelfilegt að heyra þetta. Í húsinu búi fjölskylda sem er nýflutt inn.

Lögreglan leitar nú að karlmanni, sem er grunaður um aðild að árásinni, en hann er skráður til heimilis í húsinu og þekkir konuna og son hennar.