Lengi hefur orðrómur verið uppi á meðal starfsmanna DR að klámmyndir væru geymdar í kjallara höfuðstöðvanna en aðeins nokkrir starfsmenn vissu að þetta var rétt segir í umfjöllun DR um málið. Um rúmlega 20 myndir er að ræða og eru þær á 16 mm filmum.
En enginn virðist vita af hverju myndirnar höfnuðu í geymslu DR og nú á að reyna að komast til botns í málinu.
Myndirnar þykja sögulega merkilegar en þær eru danskar, þýskar, franskar og bandarískar og allar framleiddar áður en klám var leyft í Danmörku 1969. Sumar myndanna eru rúmlega 100 ára gamlar.
Hjá DR er aðeins vitað að myndirnar voru settar í sögulegt safn ríkisútvarpsins í desember 1974 og merktar Meyers Collection. Nú á að reyna að finna út hver þessi Meyer er.
Með sumum myndunum fylgir vélritaður seðill þar sem skýrt er frá söguþræðinum í stuttu máli, gæðum upptökunnar og hvernig leikararnir stóðu sig.