Hefur þig grunað að fólk sem er í nöp við samkynhneigða og aðra minnihlutahópa á borð við transfólk og tvíkynhneigða sé ekki eins gáfað og aðrir? Þá hefur þú haft rétt fyrir þér miðað við niðurstöður nýrrar ástralskrar rannsóknar.

Fyrri rannsóknir hafa sýnt fram á tengsl fordóma og lítillar greindar. Í nýju rannsókninni kemur fram að fólk sem er minna greint en flestir hefur frekar tilhneigingu til að vera fordómafullt í garð samkynhneigðra.

Það voru vísindamenn við Queensland háskólann sem rannsökuðu þetta. Rúmlega 11.000 manns tóku þátt í rannsókninni. Vísindamennirnir notuðu þrjá þætti til að leggja mat á greind þátttakendanna. Þar á meðal var lestrarkunnátta fólks.

Þeir sem fengu lægstu einkunnirnar reyndust hafa meiri fordóma í garð samkynhneigðra og annarra minnihlutahópa. Þessi tengsl voru sérstaklega greinileg hjá þeim sem eru með lítinn orðaforða.

Niðurstöður rannsóknarinnar hafa verið birtar í vísindaritinu Intelligence.