Dönum hefur tekist að laða enn eitt gagnaverið til landsins en það verður sjötta stóra gagnaverið sem reist verður í Danmörku. Þetta nýja gagnaver verður enginn smásmíði því það mun verða 250.000 fermetrar en það svarar til um 35 knattspyrnuvalla. Það mun rísa nærri bænum Andrup við Esbjerg á vesturströnd Jótlands.

JydskeVestkysten skýrir frá þessu. Blaðið segir ekki hafa verið greint frá hvaða fyrirtæki stendur á bak við þetta gagnaver en búið er að kaupa land undir það og verið er að gera deiluskipulag svo hægt verði að reisa gagnaver á landinu. Reiknað er með að framkvæmdir hefjist í byrjun næsta árs.

Apple opnar gagnaver nærri Viborg á næsta ári og annað er í burðarliðnum  á vegum Apple nærri Aabenraa á Suður-Jótlandi. Google ætlar einnig að reisa gagnaver við Aabenraa og hefur keypt land þar. Google hefur einnig keypt land undir gagnaver nærri Fredericia á Jótlandi.

Facebook hefur tryggt sér lóð undir gagnaver nærri Óðinsvéum á Fjóni.