Eftir langa flugferð er fátt leiðinlegra en að þurfa að standa lengi við farangursfæribandið og bíða eftir töskunni sinni. Yfirleitt er þá eins og allir aðrir fái sínar töskur á undan og geti nánast tekið á sprett út úr flugstöðinni. En það er til einfalt ráð til að vera með þeim fyrstu sem fær töskurnar sínar.

Bragðið er einfalt. Á flugvöllum er hægt að fá ókeypis límmiða sem á stendur ´fragile´ (brothætt). Samkvæmt umfjöllun The Sun er þjóðráð að taka svoleiðis miða og líma á töskuna sína því töskur með þessari merkingu eru að sögn blaðsins settar síðastar í farangurslestina og því teknar fyrstar út.

Ef samviska þín hindrar þig í að nota þetta bragð þá er líka hægt að innrita sig eins seint og hægt er í flugið því töskur þeirra er innrita sig síðast fara síðast í farangurslestina og því fyrstar út.

En svo má velta fyrir sér hversu gagnleg þessi ráð eru ef mjög margir fara að nota þau.