Tveir ungir menn, 18 og 20 ára, voru skotnir í Kaupmannahöfn í gærkvöldi. Þar með er fjöldi skotárása í Kaupmannahöfn kominn í 11 síðan þann 2. apríl. Lögreglan telur að skotárásirnar tengist baráttu um yfirráð á hinum ábatasama hassmarkaði í borginni.

Um klukkan 18 í gær var tvítugur maður skotinn í Albertslund. Hann særðist á fæti. Nokkrir voru handteknir vegna málins en hafa verið látnir lausir.

Um miðnætti var 18 ára maður skotinn í fótlegg í Rødovre. Árásarmennirnir brunuðu síðan á brott í bíl. Í nótt fannst síðan brunninn bíll í Bagsværd og telur lögreglan ekki útilokað að það sé umræddur bíll.