Richard Grenell tók við embætti sendiherra Bandaríkjanna í Þýskalandi fyrir nokkrum vikum en er strax kominn í kastljós fjölmiðla og hefur valdið úlfúð meðal þýskra stjórnmálamanna. Ástæðan er að í viðtali við hægrisinnaða netmiðilinn Breitbart sagði hann að Sebastian Kurz, kanslari Austurríkis, væri „rokkstjarna“ og ræddi um framgang íhaldsafla í Evrópu.

Hann sagðist vilja styðja við aðra íhaldsmenn í Evrópu og sagðist telja að bylgja íhaldssamra stjórnmálamanna væri að skella á Evrópu og myndi ná fótfestu vegna misheppnaðrar stefnu vinstriflokka í álfunni.

„Það er enginn vafi á að það eru spennandi tímar framundan hjá mér. Ég lít yfir stöðuna og sé að við eigum enn margt eftir ógert en ég tel að kjör Donald Trump hafi veitt fólki styrk til að segja að hin pólitíska elíta hafi ekki leyfi til að ákveða fyrirfram hverjir sigra í kosningum og hverjir ættu að bjóða sig fram.“

Þetta fór fyrir brjóstið á þýskum ráðamönnum og nú hefur þýska utanríkisráðuneytið kallað Grenell á teppið þar sem hann verður krafinn nánari skýringa á ummælum sínum og hvort þau eru rétt eftir honum höfð. Spiegel greinir frá þessu.

Það er óvenjulegt að sendiherra ræði stjórnmál á þennan hátt og margir stjórnmálamenn hafa bent á að Grenell hafi misskilið hlutverk sitt sem sendiherra.

„Sem sendiherra er Grenell fulltrúi lands síns, ekki flokks síns.“

Sagði Alexander Graf Lambsdorff, þingmaður FDP, við Spiegel.

Martin Schulz, fyrrum formaður SPD, tók enn sterkar til orða:

„Grenell hegðar sér ekki eins og diplómat, heldur eins og öfgasinnaður nýlenduherra.“