Á þriðjudaginn var 24 stiga hiti á Skagen á Jótlandi í Danmörku. Eins og margir aðrir fór Rolf Christensen á ströndina til að njóta veðurblíðunnar. Vinkona hans var með í för. Þau sóluðu sig á handklæðum sínum og eins og oft gerist í sól og hita þá dottuðu þau aðeins. Þegar vinkona hans reisti sig upp heyrði Rolf hana taka andann á lofti og því opnaði hann augun. Þá blasti óvæntur gestur við honum til fóta á handklæðinu.

Þar lá höggormur samanhnipraður.

„Við höfðum ekki tekið eftir að höggormurinn hafði komið sér fyrir hjá okkur, við hliðina á henni. Hann hafði legið þétt upp að fótum vinkonu minnar en hún hafði ekki tekið eftir því. Það var ekki fyrr en hún reisti sig upp að hún sá hann. Þá varð hún hrædd en þegar ég vissi að hún hafði ekki verið bitin fór ég að hlæja.“

Hefur BT eftir honum.

Hann sagðist ekki hafa hugmynd um hversu lengi höggormurinn lá hjá þeim, hann hafi greinilega komið til þeirra í miklum rólegheitum. Hann sagði að höggormur ætti eiginlega ekki að vera úti á strönd þar sem hann er berskjaldaður í sandinum því þrátt fyrir að vera eitraður þá eru mörg dýr sem veiða höggorma sér til matar, þar á meðal fuglar og refir.

Rolf fékk lánaða fötu hjá öðrum strandgestum og setti höggorminn ofan í hana og fór með hann að klettum ofan við ströndina og sleppti honum þar.

Á vef BT er hægt að sjá mynd sem Rolf tók af höggorminum á teppinu.