Mattteo Salvini, innanríkisráðherra Ítalíu, segir að skipið fái ekki að koma til hafnar á Ítalíu og benti áhöfn þess á að sigla frekar til Möltu en stjórnvöld þar vilja ekkert með skipið eða flóttamennina hafa að gera. Á Facebook sagði Salvini að Malta taki ekki við neinu flóttafólki, Frakkar snúi fólki við á landamærunum og að Spánverjar verndi eigin landamæri með vopnum.
„Frá og með deginum í dag mun Ítalía einnig byrja að segja nei við smygli á fólki, nei við ólöglegum innflytjendum. Markmið mitt er að tryggja þessu unga fólki friðsamt líf í Afríku og börnum okkar friðsamt líf á Ítalíu.“
Þessa ákvörðun Salvini er í samræmi við loforð nýrrar ríkisstjórnar á Ítalíu en þangað hafa 600.000 flóttamenn og innflytjendur komið á undanförnum fimm árum.
SOS Mediterranee segir að samtökin fari eftir ákvörðun stjórnvalda á Ítalíu og Möltu og fari annað með fólkið. Eina markmið samtakanna sé að setj fólkið, sem var bjargað úr erfiðum aðstæðum, í land í öruggri höfn.
Sameinuðu þjóðirnar telja að um 500 manns hafi drukknað það sem af er ári við að reyna að komast frá Afríku til Evrópu yfir Miðjarðarhaf. Á síðasta ári drukknuðu um 2.850 manns í Miðjarðarhafi.