Málið hefur vakið mikla reiði í Þýskalandi og margir setja spurningamerki við Angelu Merkel, kanslara, og stefnu hennar í flóttamannamálum en eins og frægt er orðið sagði hún 2015, þegar flóttamannastraumurinn var sem allra mestur, að Þjóðverjar gætu tekist á við hann.
Þessi ummæli hennar hafa oft verið rifjuð upp í tengslum við mál sem tengjast hælisleitendum og innflytjendum en þau ná allt frá minniháttar ránsmálum upp í morð, nauðganir og hryðjuverk.
Í tengslum við mál Feldmann hefur einnig verið spurt hvernig stendur á því að tvítugur hælisleitandi, sem er grunaður um mörg afbrot, hafi fengið að búa í flóttamannamiðstöð með fjölskyldu sinni. Hann var meðal annars grunaður um að hafa nauðgað 11 ára stúlku og ofbeldisbrot þar sem hann réðst á fólk á götu úti. Einnig hefur komið fram að hann hafi oft verið ofbeldisfullur í framkomu við þá sem voru með mál hans til meðferðar í hælisumsóknarkerfinu.
Þá hefur verið spurt af hverju hann og fjölskylda hans hafi ekki verið flutt úr landi fyrst búið var að hafna umsókn þeirra um hæli.
Í gær sögðu flokksfélagar Merkel að herða þurfi reglur um hælisleitendur. Þá hefur verið boðað að tillaga verði lögð fram á þýska sambandsþinginu um að rannsóknarnefnd verði sett á laggirnar til að fara yfir þessi mál allt frá því að flóttamannastraumurinn skall á Evrópu af miklum þunga 2015. Slík rannsóknarnefnd gæti valdið Merkel pólitískum vanda og skaðað ímynd hennar sem má varla við slíku þessa dagana en pólitísk staða hennar og ímynd er frekar brothætt þessa dagana.
