Með fögrum fyrirheitum um vinnu voru tvær nígerískar konur blekktar til að fara til Svíþjóðar. Þeim hafði verið lofað vinnu í Malmö en aldrei stóð til að þær færu að vinna á almennum vinnumarkaði heldur áttu þær að stunda vændi og voru þær seldar mansali. Fyrir helgi voru karl og kona dæmd í fangelsi fyrir að hafa neytt konurnar til að stunda vændi en þau hótuðu konunum með vúdú.

Konurnar fengu lánaða peninga hjá fólkinu til að kaupa farmiða til Svíþjóðar og skulduðu þeim þar með peninga. Þeim var síðan hótað að þær myndu deyja af völdum juju, sem er nígerísk útgáfa af vúdú, ef þær greiddu skuldina ekki til baka með því að stunda vændi.

Sænska ríkisútvarpið hefur eftir Lisa Green, sem vinnur við aðgerðir gegn mansali, að hótanir um að vúdú verði beitt geti verið áhrifaríkar gegn konum frá ákveðnum svæðum í Nígeríu. Juju er framkvæmt af valdamiklu fólki og konurnar eiga erfitt með að verjast því þar sem þær trúa á vúdú.

Maðurinn var dæmdur í fjögurra og hálfs árs fangelsi fyrir mansal og peningþvætti en konan var dæmdi í þriggja og hálfs árs fangelsi.