Fundurinn þýðir að Kim Jong-un hefur verið tekinn inn í alþjóðasamfélag þjóðarleiðtoga. Hann hefur ferðast um og fengið mikla athygli frá Bandaríkjunum í aðdraganda fundarins og ekki er athyglin minni þessa stundina að fundi loknum. Kim Jong-un hefur haldið vel á spilunum og skipulagt atburðarrásina vel og skiptir þá kannski ekki öllu hvað stendur í sáttmálanum sem skrifað var undir í morgun. Hér er hægt að lesa umfjöllun DV frá í gær um langtímastefnu Kim Jong-un sem náði hugsanlega hámarki í nótt með leiðtogafundinum.
Trump segist ætla að upplýsa um innihald sáttmálans á fréttamannafundi og bíða flestir spenntir eftir þeim fundi. Fram hefur komið að Kim Jong-un hafi lofað kjarnorkuafvopnun. Ef það er rétt er spurningin hvað Norður-Kórea fær í staðinn. Verður það efnahagslegur stuðningur eða heita Bandaríkin að tryggja öryggi landsins? Þá velta margir fyrir sér hvort sáttmálinn taki á hinu ólokna stríði Norður- og Suður-Kóreu en því er enn ólokið formlega.
Norður-Kórea setti upp þrönga tímaáætlun fyrir fundinn og það sama gerðu Bandaríkin. Fundurinn var ekki framlengdur en það getur bent til að menn hafi ekki komist mjög langt í samningaviðræðum, hugsanlega verið sammála um að halda viðræðum áfram en hafi ekki tekist á við stóru málin. Þá munu embættismenn ríkjanna hugsanlega halda viðræðum áfram til að reyna að komast lengra með samning ríkjanna.
Trump sagði að fundi loknum að Kim Jong-un verði boðið í heimsókn í Hvíta húsið en hvort það rætist mun tíminn einn leiða í ljós.
Þá má ekki gleyma að Norður-Kórea hefur margoft gert samninga við einstök ríki og alþjóðasamfélagið en hefur ekki hikað við að svíkja þá samninga.