Framkvæmdastjórn ESB vill nota milljarða evra til að efla gæslu á ytri landamærum ESB. Meðal annars eru hugmyndir um að vera með 10.000 landamæraverði, kaup á hátæknibúnaði fyrir milljarða evra og að milljörðum evra verði varið í þá innflytjendur og flóttamenn sem sleppa í gegn þrátt fyrir aukna gæslu.

Með þessum aðgerðum vill framkvæmdastjórnin sýna að hún geti gripið til aðgerða vegna flóttamannavandans sem steðjar að Evrópu. Tillögurnar voru kynntar í Strassborg í gær. Fréttir af 629 flóttamönnum um borð í björgunarskipinu Aquarius skyggðu þó á kynninguna en Aquarius hefur verið á siglingu í Miðjarðarhafi undanfarna daga í leit að höfn þar sem má leggja að með flóttamennina.

Framkvæmdastjórnin vill rúmlega tvöfalda fjárveitingar til flóttamannamála og landamæragæslu á næstu sjö árum. Mest á að fara í landamæragæslu en einnig verður fjármagni veitt til að senda flóttamenn og innflytjendur aftur heim og í samvinnu við önnur ríki.

Nú hefjast samningaviðræður ESB við aðildarríkin um tillögur framkvæmdastjórnarinnar. Fyrst verða aðildarríkin þó að ná samkomulagi um hvernig flóttamanna- og innflytjendakerfið á að virka. Enn er grundvallarágreiningur þeirra á milli um þessi mál, um hvernig á að skipta byrðinni og hver á að bera ábyrgð.