Eigandi kynlífsdúkkuverslunarinnar Lovedoll í Gateshead á Englandi hefur verið sektaður um 10.000 pund fyrir að leyfa viðskiptavinum verslunarinnar að prófa kynlífsdúkkur, sem voru til sölu í versluninni, áður en þeir keyptu þær.

BBC skýrir frá þessu. Fram kemur að verslunin hafi boðið væntanlegum viðskiptavinum að taka dúkkurnar með inn í svefnherbergi, sem var í versluninni, til að prófa þær gegn því að greiða 50 pund fyrir.

Það var í janúar sem yfirvöld höfðu afskipti af rekstri verslunarinnar eftir að kvartanir höfðu borist um að eigandinn ræki kynlífsdúkkuvændishús. Eigandinn sýndi lögreglumönnum verslunina og þar á meðal svefnherbergið þar sem viðskiptavinir máttu prófa dúkkurnar. En eigandanum hafði yfirsést að í Englandi þarf að fá leyfi til að bjóða upp á kynlífsþjónustu með dúkkum.

Graeme Tulip, eigandi verslunarinnar, sagði í samtali við BBC Radio 5 að markmiðið með því að leyfa væntanlegum viðskiptavinum að prófa dúkkurnar hafi ekki verið að selja þeim kynlíf, heldur að leyfa þeim að prófa dúkkurnar þar sem þær séu frekar dýrar og um töluverða fjárfestingu að ræða. Þær kosta sem svarar rúmlega 200.000 íslenskum krónum stykkið.

Það færist í aukana að kynlífsvændishús séu opnuð en á síðasta ári tók eitt slíkt til starfa í Barcelona á Spáni og fyrr á þessu ári opnað eitt slíkt í Árósum í Danmörku.