Líf Ekkapol Chanthawong, sem er þjálfari fótboltastrákanna 12 sem sitja fastir í helli í Taílandi, hefur svo sannarlega ekki verið neinn dans á rósum. Hann missti foreldra sína og yngri bróður 2003 þegar alvarlegur sjúkdómsfaraldur herjaði á þorpið hans í norðurhluta Taílands. Hann var þá 10 ára. Hann var þá settur í umsjá ættingja. Frænka hans segir að hann hafi verið einmana og sorgmæddur drengur.

Eftir nokkurn tíma ákváðu ættingjarnir að senda hann í Búddahof þar sem hann bjó næstu 10 árin sem munkur. News.com.au skýrir frá þessu. Hann er sagður geta hugleitt löngum stundum og að það hafi örugglega hjálpað honum og strákunum eftir að þeir festust inni í hellinum.

Fótboltalið strákanna heitir Wild Bears og var stofnað fyrir þremur árum í Chiang Rai héraðinu. Flestir strákanna tilheyra minnihlutahópum og búa við fátækt.

CNN skýrði frá því fyrir helgi að Chanthawong og tveir piltanna væru svo veikburða að þeir gætu ekki komist út úr hellinum.

Björgunaraðgerðir hófust í morgun eins og DV skýrði frá.