Um klukkan 1 í nótt hugðust lögreglumenn stöðva akstur ökumanns á Sæbraut. Ökumaður þeirrar bifreiðar var hins vegar ekki á þeim buxunum að eiga samskipti við lögregluna og jók hraðann og reyndi að stinga lögregluna af. Hann ók víða um miðborgina og það ekki alltaf samkvæmt umferðarreglum.

Hann ók á móti umferð, á móti rauðu ljósi, braut stöðvunarskyldu við gatnamót, ók á gangstéttum og braut fleiri ákvæði umferðarlaga. Eftirförinni lauk við Öldugötu þar sem ökumaðurinn ók á bifreiðar. Bæði ökumaður og farþegi í bifreiðinni voru handteknir en þeir eru báðir grunaðir um að hafa verið undir áhrifum fíkniefna. Ökumaðurinn var fluttur á slysadeild til aðhlynningar áður en hann var vistaður í fangageymslu.