Í upphafi var þetta undir vinstra auganu og leit út eins og bóla. Fimm dögum eftir að hún tók fyrst eftir þessu færði þetta sig yfir vinstra augað. Tíu dögum síðar fór þetta aftur á ferðina og færði sig í efri vörina.

Það var 32 ára rússnesk kona sem lenti í þessu. Hún tók myndir af þessum hlut sem færðist til í andliti hennar og gat því sýnt fram á ferðalagið. The New England Journal of Medicine skýrir frá þessu. Konan leitaði til læknis sem uppgötvaði að sníkjudýr, ormur, var undir húð hennar og flutti sig reglulega um stað.

Konan hafði skömmu áður verið á ferð utan við Moskvu og var þá bitin af mýflugu. Talið er að sníkjudýrið hafi þá borist í hana. Þetta gerist stundum eftir því sem segir í umfjöllun Washington Post. Þá hefur mýflugan fengið fósturvísa sníkjudýrsins í sig við að sjúga blóð. Fósturvísirinn þroskast síðan í mýflugunni og verður að lirfu. Þegar mýflugan bítur dýr eða manneskju grípur lirfan tækifærið og skríður inn í nýjan hýsil og vex þar og verður að ormi.

Læknar náðu orminum úr andliti konunnar en þetta reyndist vera ormur af tegundinni Dirofilaria repens eða spóluormur en þeir leggjast yfirleitt á dýr á borð við hunda og ketti. Ormar þessarar tegundar geta orðið um 15 sm langir. Þeir eru yfirleitt ekki hættulegir en geta þó kallað fram ofnæmisviðbrögð.

Rússnesku konuna klæjaði og sveið undan orminum en annars fann hún lítið fyrir honum og slapp alveg heil á húfi frá þessari óþægilegu lífsreynslu.