„Í dag er 10. júlí 2018. Dagurinn verður lengri en þeir fyrri en við munum fagna saman á endanum.“ Segir í færslu á Facebooksíðu taílensku sérsveitarinnar sem kemur að björgun strákanna.
Ivan Karadzic er danskur kafari sem hefur tekið þátt í björgunaraðgerðunum. Hann hrósaði strákunum í hástert í samtali við BBC.
„Þeir hafa neyðst til að gera hluti sem engin börn hafa gert áður. Það er ekki eðlilegt að kafa í helli þegar þú ert 11 ára. Þeir kafa við aðstæður sem eru taldar gríðarlega hættulegar, útsýnið er ekkert og eina ljósið sem er til staðar er það sem þú tekur með þér. Ég skil ekki hversu rólegir þeir eru . . . ótrúlega sterkir strákar.“
Læknir og þrír meðlimir taílensku sérsveitanna hafa verið hjá strákunum síðan þeir fundust fyrir rúmlega viku. Þeir yfirgefa hellinn einnig í dag.
Mikið rigndi í nótt og enn fleiri dælur hafa verið settar upp til að reyna að halda vatninu í hellakerfinu í skefjum. Norska ríkisútvarpið hefur eftir einum stjórnanda aðgerðanna að súrefnismagnið í hellinum sé nú orðið hættulega lágt, sé aðeins 15 prósent, og ekki sé hægt að flytja meira súrefni inn í hellinn. Þá hefur vatnsmagnið í hellakerfinu aukist síðan í gær og gerir aðgerðir dagsins erfiðari.
Hér fyrir neðan er hægt að horfa á beina fréttaútsendingu um björgunaraðgerðirnar.