Á laugardagskvöldið var lögreglunni í Missoula sýslu í Bandaríkjunum tilkynnt um grunsamlega hegðun manns í Lolo Hot Springs. Maðurinn, Francis Carlton Crowley, hafði hótað fólki og var vopnaður skammbyssu. Það fylgdi einnig sögunni að fimm mánaða barn, sem Crowley átti að gæta, hefði ekki sést klukkustundum saman.

Lögreglumenn fundu Crowley fljótlega og handtóku hann en barnið fundu þeir ekki. Það var ekki til að bæta ástandið að Crowley var undir svo miklum áhrifum fíkniefna að hann gat ekki veitt neinar gagnlegar upplýsingar um hvar barnið væri. En út frá því sem hann sagði taldi lögreglan að barnið væri hugsanlega grafið einhversstaðar á svæðinu og því hófst umfangsmikil leit.

Eftir sex klukkustunda leit heyrði lögreglumaður lágan grát. Hann gekk á hljóðið og fann barnið á lífi. Það lá á grúfu undir trjágróðri og rusli. Þá var hitastigið á svæðinu aðeins 7 til 8 gráður og barnið því orðið kalt.

Barnið var strax flutt á sjúkrahús en læknar segja að það hafi sloppið vel og muni ná sér að fullu.

Crowley, sem er ekki faðir barnsins, hefur verið kærður fyrir að hafa stofnað lífi barnsins í hættu og á von á fleiri kærum. Hann situr nú í gæsluvarðhaldi.