Þrátt fyrir að hinir grunuðu sitji í gæsluvarðhaldi eru margir foreldrar áhyggjufullir og sleppa varla augunum af börnum sínum. Í umfjöllun Berlingske kemur fram að piltarnir neiti allir sök og að enn hafi ekki verið gefnar út ákærur á hendur þeim. Þeir eru allir innflytjendur í Danmörku.
Blaðamaður Berlingske heimsótti svæðið nýlega og ræddi við fólk sem er illa brugðið vegna málanna og hversu gróf þau eru. Samkvæmt dómbókum þá átti fyrsta nauðgunin sér stað um miðjan október á síðasta ári þegar sex piltar ruddust inn í hús í Kokkedal þar sem þrír þeirra neyddu 14 ára stúlku til munnmaka. Mánuði síðar réðust piltarnir aftur á þessa sömu stúlku og neyddu þrír þeirra hana til munnmaka og nauðguðu henni. Daginn eftir var enn og aftur ráðist á hana og hún beitt kynferðislegu ofbeldi.
Auk þessarar stúlku urðu fjórar aðrar stúlkur, á aldrinum 13 til 16 ára, fyrir grófu kynferðisofbeldi frá einum eða fleiri hinna handteknu. Þetta átti sér stað frá því í október þar til í apríl á þessu ári.
Það vakti athygli í síðasta mánuði þegar faðir eins hinna grunuðu sagði að ekki væri um nauðgun að ræða ef strákar væru með stelpu heima hjá henni. Hér er hægt að lesa frétt DV um þetta.
Lögreglan tekur málin mjög alvarlega og mikill þungi hefur verið í rannsókn þeirra. Henrik Gunst, sem stýrir rannsókn málanna, segir að hann hafi aldrei áður rannsakað svo gróf mál sem þessi. Piltarnir hafi ekki haft nein mörk og hafi litið á stúlkurnar sem einhverskonar hlaðborð.