Kannski var ekki allt sem sýndist í apríl 2016 þegar 12 norður-kóreskar konur komu til Suður-Kóreu. Þær höfðu starfað á norður-kóreskum veitingastað í Kína en síðan fylgdi einn yfirmanna þeirra þeim yfir til Suður-Kóreu. Þá var talað um að þær hefðu flúið frá heimalandi sínu eins og svo margir aðrir hafa gert. En nú hafa vaknað spurningar um hvort þær hafi virkilega viljað enda í Suður-Kóreu.

Tomas Ojea Quintana sérstakur fulltrúi SÞ, sem rannsakar mannréttindi í Norður-Kóreu, hefur vakið máls á þessu. Hann hefur rætt við sumar af konunum. Suður-kóreska fréttastofan Yonhap skýrir frá þessu. Haft er eftir honum að það verði að virða vilja kvennanna sem fórnarlamba.

„Þegar ég kalla þær fórnarlömb gef ég um leið í skyn að þær geti hafa verið fórnarlömb svikastarfsemi.“

Er haft eftir honum. Hann segir að konurnar hafi mjög mismunandi skoðanir á að hafa endað í Suður-Kóreu en leggur áherslu á að hugsanlega hafi eitthvað „glæpsamlegt“ átt sér stað og að yfirvöldum í Suður-Kóreu beri skylda til að láta rannsaka málið ofan í kjölinn.

Stjórnvöld í Norður-Kóreu hafa löngum sagt að konurnar hafi endað í Suður-Kóreu gegn vilja sínum.