Það er líklegast óhæt að segja að síðustu fjórum fótboltastrákunum og þjálfara þeirra hafi verið bjargað á síðustu stundu úr Tam Luang hellinum í Taílandi í gær. Rétt eftir að síðasti maðurinn kom út úr hellinum bilaði aðalvatnsdælan sem var notuð til að halda vatnsmagninu í hellakerfinu í skefjum.

Dælan hafði gengið viðstöðulaust í 18 sólarhringa en í gær gafst hún síðan upp. Dælan var nauðsynleg til að halda vatnsmagninu í skefjum en monsúnrigningar herja nú á Taíland.

ABC News segir að það hafi aðallega verið kafarar frá úrvalssveitum taílenska hersins sem björguðu strákunum út úr hellinum. Kafararnir hafi fundið að vatnsborðið í hellinum hækkaði hratt eftir að dælan bilaði en þá voru þeir að flytja síðustu súrefniskútana út.

Strákarnir 12 og þjálfari þeirra eru nú á sjúkrahúsi og verða næstu daga. Rannsóknir hafa leitt í ljós að þeir eru við góða heilsu en læknar vilja fylgjast með þeim næstu daga til öryggis. Miklar líkur eru á að smitast af ýmsum sjúkdómum við svo langa veru í helli en leðurblökur og saur úr þeim geta borið ýmsa óværu með sér sem og skordýr sem búa í hellinum. Þess utan veikist ónæmiskerfi fólks ef það er lengi í myrkri.