Þegar liðsmenn SAS úrvalssveita breska hersins voru í eftirlitsferð í Sýrlandi stöðvuðu þeir brynvarðar bifreiðar sína í litlu þorpi og fóru sex hermenn út til að halda áfram á fæti. En skömmu eftir að þeir yfirgáfu bifreiðarnar lentu þeir í umsátri. Þeir voru umkringdir og sóttu öfasinnaðir íslamistar að þeim úr öllum áttum á meðan hermennirnir og öfgamennirnir skiptust á skotum.

Hermennirnir slepptu þá hundi, sem var með þeim í för, lausum. Um er að ræða sérþjálfaðan hund af tegundinni Belgian Malinois en þetta er fjárhundur sem er þekktur fyrir hugrekki. Samkvæmt frétt Daily Star þá hljóp hundurinn að öfgamanni, sem var með vélbyssu, og beit hann í hálsinn og drap. Því næst réðst hann á tvo aðra árásarmenn og slasaði þá alvarlega. Við þetta urðu hinir sex árásarmennirnir svo hræddir að þeir lögðu á flótta.

Þetta er sagt hafa gerst fyrir tveimur mánuðum en SAS hélt þessu leyndu þar til nýlega af öryggisástæðum.

Það fylgir sögunni að hundurinn hafi verið nær ómeiddur eftir þetta. Stjórnandi hermannanna segir að hundurinn hafi bjargað lífi þeirra.