Donald Trump, Bandaríkjaforseti, hefur fyrirskipað að refsitollar verði lagðir á kínverskar vörur að verðmæti 200 milljarða dollara. Þetta eru viðbrögð við þeim refsitollum sem Kínverjar lögðu á bandarískar vörur að verðmæti 34 milljarða dollara og hótana þeirra um að leggja tolla á enn fleiri vörur.

Reiknað er með að Kínverjar muni svara þessum tollum en þeir geta þó ekki lagt refsitolla á bandarískar vörur fyrir svipað verðmæti því innflutningur þeirra frá Bandaríkjunum á síðasta ári nam aðeins 135 milljörðum dollara. En reikna má með að Kínverjar muni svara eftir öðrum leiðum. Til dæmis geta þeir gert Kínverjum erfiðara fyrir með að ferðast til Bandaríkjanna eða gert bandarískum fyrirtækjum erfitt fyrir að vera með rekstur í Kína.

Margir áhrifamiklir repúblikanar hafa gagnrýnt þessa tolla og segja þá ekki munu hafa neitt gott í för með sér.