Síðasta tilfellið var í síðustu viku þegar Celia Williams Lundh fann plastpoka á vélarhlíf bílsins síns þegar hún hafði lokið kvöldvakt og var á leið heim. Í samtali við TV2 sagðist hún í fyrstu hafa haldið að einhver hefði gleymt pokanum á bílnum en enga manneskju hafi verið að sjá nærri bílnum. Hún tók því pokann með heim og opnaði síðan pakkana sem voru í honum.
Í þeim var einn poki af haframjöli, tveir sígarettupakkar og klukka. Að vonum var Celia mjög hissa á þessu. Hún birti því færslu á Facebook til að kanna hvort einhver vissi eitthvað um málið. Færslan leiddi til að sex konur til viðbótar skýrðu frá samskonar gjöfum sem þær hafa fengið á undanförnum átta árum að sögn Lofotposten. Ekki er útilokað að þær séu fleiri þar sem ekki er víst að allar hafi séð Facebookfærsluna.
Ein þeirra sem hefur einnig fengið poka með svona gjöfum í er Monica Andersen en hún fann poka á vélarhlíf bíls síns í desember 2013. Í honum voru pakki af haframjöli, tveir sígarettupakkar (Marlboro Gold) og klukka. Monica reykti Marlboro Gold á þessum tíma og taldi því að einhver sem hún þekkir hefði skilið pokann eftir á bílnum. Hún var í sambandi á þessum tíma og hringdi í manninn til að spyrja hvort hann hefði skilið pokann eftir en svo var ekki. Hún lýsti eftir eiganda pokans á Facebook, hafði samband við lögregluna og verslunina, sem pokinn var frá, en komst engu nær lausn málsins. Hún ákvað því að halda gjöfunum og segist hafa notað klukkuna hvern einasta dag síðan.
„Ég er mjög ánægð með klukkuna. Ég hef notað hana í fimm ár og ekkert skelfilegt hefur komið fyrir mig.“
Sagði hún í samtali við TV2.
Hinar konurnar, sem gáfu sig fram, hafa heldur ekki hugmynd um hver gaf þeim þessar undarlegu gjafir eða af hverju. Það er heldur ekki að sjá neitt mynstur í hver fær gjafir nema hvað það eru alltaf konur. Margir af pokunum hafa fundist á bílum utan við Lofotsenteret í Leknes.
Það bætti ekki líðan Celia að heyra að fleiri konur hafi lent í þessu sama. Hún sagðist hafa orðið mjög hrædd og hafi farið að hugsa um hver hafi verið að verki og hafi orðið mjög hrædd við viðkomandi. Hún sagðist telja að viðkomandi þarfnist hjálpar. Það sé óþægilegt að hugsa til þess að kannski hafi viðkomandi staðið og horft á hana taka pokann.