Á þriðja tímanum í nótt var tilkynnt um innbrot í hjólageymslu hjá fyrirtæki við Sturlugötu í Reykjavík. Þrír menn voru sagðir hafa brotist inn. Skömmu síðar voru tveir menn handteknir grunaðir um innbrot. Þeir voru hjólandi en hentu hjólunum frá sér og reyndu að hlaupa frá lögreglunni en laganna verðir reyndust vera fljótari að hlaupa og náðu þeim. Mennirnir voru vistaðir í fangageymslu.

Á fjórða tímanum barst tilkynning um að karlmaður væri að ráðast á konu við Konukot. Maðurinn var í mjög annarlegu ástandi og var hann vistaður í fangageymslu vegna rannsóknar málsins.

Klukkan tvö í nótt var akstur ökumanns bifhjóls stöðvaður á Reykjanesbraut við IKEA. Hraði hjólsins mældist 131 km/klst en leyfður hámarkshraði er 80 km/klst. Ökumaðurinn er grunaður um að hafa verið undir áhrifum fíkniefna. Annar ökumaður var handtekinn í gærkvöldi grunaður um akstur undir áhrifum fíkniefna og akstur sviptur ökuréttindum.

Tveir ökumenn voru handteknir í nótt grunaðir um ölvun við akstur og annar þeirra reyndist ekki hafa öðlast ökuréttindi en hefur ekki látið það stöðva sig en hann hefur ítrekað verið stöðvaður við akstur.

Á sjötta tímanum í gær höfðu lögreglumenn afskipti af manni við fjölbýlishús í Breiðholti. Maðurinn framvísaði meintum fíkniefnum. Á tólfta tímanum voru höfð afskipti af pari við Þórðarsveig en það er grunað um vörslu fíkniefna.