Nú eiga rúmlega 100.000 íbúar Helsinki í Finnlandi annað móðurmál en finnsku, sænsku eða samísku sem eru hin opinberu tungumál Finnlands. 15,3 prósent íbúa borgarinnar eiga því annað móðurmál en þessi þrjú opinberu tungumál landsins. Þá segja sumir sænskumælandi Finnar að það verði sífellt erfiðara að bjarga sér á sænsku í borginni og oft á tíðum sé auðveldara að eiga samskipti á ensku en sænsku en stundum sé ekkert annað í boði en að tala finnsku.

Þetta kemur fram í umfjöllun Finnska ríkisútvarpsins. Þar segir að þau tungumál sem flestir tali utan finnsku, sænsku og samísku séu rússneska, eistneska og sómalska. Þá fer hópur þeirra sem eiga arabísku, persísku og víetnömsku sem móðurmál stækkandi.

Borið hefur á því á undanförnum árum að viðmót Finna í garð sænskumælandi landa sinna sé að breytast til hins verra og litið sé niður á þá. Sænskumælandi Finnar líta ekki á sig sem Svía heldur einfaldlega sem sænskumælandi Finna og hafa reynt að standa vörð um menningu sína og tungumál og hefur það tekist fram að þessu.