Á sama tíma og margir íbúar ítölsku borgarinnar Torino fagna kaupum knattspyrnuliðs borgarinnar, Juventus, á Cristiano Ronaldo eru aðrir sem eru ekki alveg eins ánægðir. Það á svo sannarlega við um starfsmenn í verksmiðju Fiat í Melfi en þeir hafa ákveðið að leggja niður störf á sunnudag og mánudag. Þetta er gert í mótmælaskyni við eigendur Fiat en svo vill einmitt til að þeir eiga meirihluta hlutabréfa í Juventus.

Starfsmennirnir gagnrýna kaupin á Ronaldo og svimandi há laun hans en hann er sagður fá 2,5 milljónir evra í mánaðarlaun fyrir vinnuframlag sitt á knattspyrnuvellinum. Auk þess greiðir Juventus rúmlega 100 milljónir evra fyrir hann til Real Madrid.

„Er þetta sanngjarnt? Er eðlilegt að einn maður þéni milljónir á meðan mörg þúsund fjölskyldur eiga ekki peninga til að komast í gegnum helming mánaðarins? Við erum öll ráðin af sama vinnuveitandanum og getum – og eigum – ekki að sætta okkur við svona mismunun. Starfsmenn Fiat hafa aflað hárra fjárhæða fyrir fyrirtækið í að minnsta kosti þrjár kynslóðir en hafa aðeins fengið líf í örbirgð í staðinn.“

Segir í yfirlýsingu frá stéttarfélaginu Unione Sindacale di Base.