Vísindamenn segjast hafa fundið mannvistarleifar í Kína sem sýni að menn hafi haldið mun fyrr frá Afríku en áður var talið. Steinverkfæri, sem fundust í Kína, benda til að frumstæðir menn eða nánir ættingjar manna hafi verið þar fyrir 2,12 milljónum ára. Ef rétt reynist er þetta 270.000 árum fyrr en áður var talið.

Mannvistarleifar, sem fundust í Dmanisi í Georgíu, hafa fram að þessu verið taldar elstu mannvistarleifar utan Afríku. Fjallað er um nýju rannsóknina og niðurstöðu hennar í tímaritinu Nature. Það voru kínverskir og breskir vísindamenn sem komu að rannsókninni.

Steinverkfærin fundust á Shangchen sléttunni í norðurhluta Kína. Um nokkrar mismunandi tegundir verkfæra er að ræða og bera þau öll merki þess að hafa verið notuð. Ekki er þó vitað með vissu hvaða tegund manna bjó þessi verkfæri til. BBC skýrir frá þessu.