Fylgjendum Barack Obama, fyrrum Bandaríkjaforseta, á samfélagsmiðlinum Twitter fækkaði nýlega um þrjár milljónir. En með 101 milljón fylgjenda gnæfir hann yfir Donald Trump, núverandi forseta Bandaríkjanna, sem er „aðeins“ með 53 milljónir fylgjenda en hann missti 340.000 fylgjendur nýlega. Allt var þetta liður í tiltekt hjá Twitter þar sem reynt var að eyða „fölskum notendum“ út.

Það hlýtur að pirra Trump að Obama er með fleiri fylgjendur á Twitter enda virðist allt sem Obama gerði í valdatíð sinni og síðan hann lét af embætti fara í taugarnar á Trump.

Þess utan er Obama í þriðja sæti yfir vinsælustu Twitternotendurna með 101 milljón fylgjenda. Justin Bieber er með 104 milljónir fylgjenda og Katy Perry með 106 milljónir.

Á einni nóttu voru tugir milljóna aðganga fjarlægðir af Twitter en sumir hafa notað „falska notendur“ til að styrkja tölfræði sína og virðast vinsælli og áhrifameiri en þeir eru í raun og veru.